المراثي بلسان اهل هذا العصر علي الطريقة المعروفة بالنعي للشيخ محمد
الكون اظلم ابعج الخيل و اغبر
اوشع ابلمعة الانصار و ازهر
احتوف هايجة او ما تعرف الذل
اشلون الي يعرينه او هاج مشبل
تلوي دون عزها لوية الصل
ابز اغوره او نفج علموت الاحمر
كل لماع مدرع يشع للناس
وجهه و الدرع و السيف و الطاس
متبسم امشرعب ناشر الراس
كفو بالموت دون احسين مستر
اشجم حران من رمحه ايتطاير
تقول الموت من سيفه ايتكاطر
ما والله كرب ليه او تجاسر
عكوبسها او ضل بالكون يذكر
احلولك من لفت ذيچ المشاهير
احلول الموت و حلول المغاوير
اظلم الكون بس لمع الغدادير
تشع و وجوهها بالكون تزهر
لو صاح الحريب او رجوا الزان
ما و الله ضل بالكون حران
تغدي اكرو مهاشي شفت غزلان
ابمرتعها اسباع الزور تفتر
كضو حق العليهم دون الخيام
اولا خلو اخوات احسين تنضام
لما طاحوا تفايض منهم الهام
تهاووا مثل مهوي النجم من حر
علي الانصار يا كلبي تفطر
تهاووا مثل مهوي النجم من خر
هذا الرمح بفاوده تثنه
او هذا بيه للنشاب رنه
او هذا الخيل صدره رضرضنه
او هذا او ذاك بالهندي اموذر
هووا ما بين من كطعوا وريده
وقع رأسه او بين اطارت ايده
او بين امشبح ابرميه شديده
او بين اصار للنشاب مكور
او يلي الروس شالوها علي الزان
او لعبت خيلهم علجثث ميدان
نجوم اتموج من دمها ابغدران
نوب تطفح او نوب تغور
ركب غوجه او تعن احسين ليها
لكاها بس جثث و مسلبيها
صب الدمع و تلهف عليها
او كال احتسب عندالله و اصبر
وي احسين ما ضل بلمخيم
غير اولاده اخوه و ولاد مسلم
و ولاده و خوته او لدة العم
و غير اولاد عبدالله بن جعفر
او يلي من الانصار الخيم تصفر
بس اولاد هاشم نجم تزهر
الكل شبان ما منها لبخده
اختط الشعر لا والله اوجده
او بين ادرك ابلوغ او بين بعده
او بين البلمهد يلعوا و يفغر
يويلي منتلا كوا عنده الوداع
دروا ما بعد ملكي غير هساع
غدا ماي الدمع ينچال بالصاع
او ثكلي اكلوبها من العطش و الحر
هذا يشبك ابهذا او يحبه
او هذا ابكلب هذا يحط كلبه
او هذا دمعه الهذا يصبه
او هذا يشم خد هذا او يصفر
او يلي غدت للشبان حنه
غدا هذا الهذا يجرونه
او كل واحد لعد موته تمنه
و لا يبقي الهذا اليوم الا كشر
سبق للحرب عبدالله بن مسلم
امنتب من ابوه النفل و الام
شباب بن اهدعش مزراق من سم
تلوه او نفج يقطر موت احمر
ابن مسلم لعند الحرب شمر
شباب او لا يخاف الموت مشهر
اسم الله اعليه فرع بالذوايب
كمر لاچن ابليل الشعر غايب
حاط الخيل و دعاها جنايب
او خلاها امروج تموج بالبر
يشع بسام و الميدان مسود
او رجف زانته و الموت يرعد
تنخه او كال و لكم چي الهلحد
لراويكم اليوم الموت الاحمر
ابن هاشم او شبل الليث معلوم
جربت و الزمط ينعرف هليوم
طفحها او ذبها علي الصمصوم
او رد النبع بالهندي امكسر
حر يخطف الزانات و تذيه
او من ينصب الچفة الموت يلويه
يجر سيفه و المكدر يشع بيه
او خاف الموت من عنده او كشر
اجاه السهم بس تسمع رعيده
امنيشن قصته ابرميه شديده
شكف عن الوجه ويلاه بيده
سمرها القصته او خلاه يفغر
يا كلبي لبن مسلم تفطر
شباب او مثل روح الطير منخر
عجز ويلاه عن تحريك چفه
ايس من حياته او كرب حتفه
نفض ويلي عدوه اعليه شلفه
تكور مثل روح الطير من خر
عزيز الروح بالتربان ممدود
او دم السهم يجري فوق الخدود
كمر لاچن ابدم اشرق او بچيود
يوسفه عليه بالرمله امعفر
شابچ تحت عج الخيل عينه
ما ينشاف بس تسمع و نينه
يريد احد يغمضله اعيونه
ايس و اغرفت روحه امن الحر
اشبيب و الهنادي و زعنه
و ابدم الشهادة غسلنه
ابعج الخيل ويلي چفننه
او دفننه ابشعاع الشمس و الحر
نزلوا بعد ابن مسلم الشبان
تنخوا و اسفروا لمطالق الزان
حاسوا خيلها و شلوا الميدان
لما خروا تقول انجوم و تخر
علي الشبان يا كلبي تفطر
تهاووا مثل مهوي النجم من خر
بعدهم لع طفل امن الصواوين
امطوق و التراچي اعلي الخدين
يدير العين يسره او نوب ايمين
طفل مدهوش يتلفت امذعر
ابچبده من لهيب العطش بورح
تراچيه علي خده تطوطح
عليه السهم يا ويلي تلولح
ابوريده وقع لا جدم او وخر
ظلت شهربانه بس تولول
علي التربان يا ويلي المدلل
طوكه بفيض اوريده امبلل
فوق الرمل تحت الشمس و الحر
غدوا و سفه بني هاشم مطاعين
جميع او موحشه منها الصواوين
و لا ناصر بكي منهم وي احسين
بس عباس و الجاسم و الاكبر
ابوفاضل تلولح فوق الاشكر
ليت هاج من شيبه امعير
نزل عباس يتمرضع بلحسين
يحب ايده او جدم رجليه و العين
تسايل بالمدامع علي الخدين
لما حن او بچكي احسين او تحسر
صاح احسين يا خويه يعباس
ينور العين يا تاجي علي الراس
بخوي انت الدرع و السيف و الطاس
اشلون اتروح و انا ابكي امحير
يخوي احسين يا زهرة ايامي
يخوي نحلت سكنه اعظامي
خليني اريد الحق عمامي
اريد الثار قلبي دم يفور
يكله او داعة الله يا عيوني
نيتكم او حيدي تخلوني
ركب و ارزم و كلهم تعرفوني
طليعة حيدر الليث المشكر
تشعشع بالحرب عنده الحرب عيد
سم ابصاجعه او طاحت امن رعيد
يحسب السيف مبسم و النبل غيد
تتماوع او عج الخيل عنبر
عروس الحرب و العباس عريس
ايبتختر بين زفافه ملابيس
نكس و ارعب اكلوب المداليس
او طفحها كفوا نعمين و اكثر
شمر فوكها او خلا المداريع
ما تعرف رسنها امن المصاريع
تهاوت و اخلست بين المشاليع
تخف ارواحها من الموت الاحمر
كلب يمني الحرب من فوق يسراه
او يسري الحرب ذبها فوق يمناه
لوي الجنحين فوق الكلب و لواه
عليهن و العزيز الروح من فر
حرب عباس من صحه او يعرفه
بيده السيف و البيرغ ابچفه
او بيده الصرع و الكربه ابچتفه
مترهي تلولح علي العسكر
يحاچي النفس يا نفسي تهونين
كل الناس تغدي فدوة احسين
الف و سفه يا خوي مالك امعين
تضل بعدي يبوسكنه امحير
ابوفاضل ولي الشاطي او حدر
او چبده من لهيب العطش فطر
خاض الماي بس هيس اببرده
ترس چفه يروي عطش چبده
تذكر لن اخوه احسين بعده
ذب الماي من چفه او تحسر
هذا الماي يجري بطون حيات
وضو كه كبل حدا حسين هيهات
اظن طفله يويلي امن العطش مات
و ظن موتي كرب و العمر كصر
اشلون اشرب و خوي الحسين عطشان
و سكنه و الحرم و اطفال رضعان
و ظن كلب العليل التهب نيران
يريت الماي بعده لا حلا اومر
همته بس يوصل الماي لحسين
لا كامن اولا كدن الچفين
همه اطفال موتي بالصواوين
عطاشا اكلوبهم تلهب من الحر
طاح ايمين ابوفاضل و الايسر
خطف جوده ابحلكه او للخيم فر
اجاه السهم للكربه او فراها
و كف يبچي او سكنه ما نساها
مواعد علي اميه لحشاها
او منها يستحي للخيم يسدر
سمع حسين حسه ركب و ارزم
غار علي الخيم طلعها من الخيم
رديمه او شافه سابح ابدم
تخوصر فوق راسه و الدمع خر
حط راسه ابحضنه بكلب مرتاع
شاله او تربه عباس بالكاع
رد احسين راسه ابكلب مرتاع
شاله اردود للتربان و الحر
يخوي العلم كلي وين اوديه
ينور العين دربي بيش اجديه
حنا فوكه او شمه او شبچ ايديه
او صاح احسين اخوي الله و اكبر
يخوي انكسر ظهري اولا اكدرا كوم
صرت مركز يخوي الكل الهموم
يخوي استوحدوني عكبك الكوم
اولا واحد عليه بعد ينغر
يخوي امنين اجتني هالرميه
يخوي اساوكع بيتي عليه
يخوي اساعدوي شمت بيه
و شوفنك يبو فاضل امطبر
راد احسين شيله للصواوين
انتبه عباس لحسين او زرق عين
يكله اشرادتك يا خوي يحسين
يكله اريد اشيلنك و سدر
يخوي احسين خليني ابمچاني
يكله ليش يا زهرة زماني
يكله واعدت سكنة تراني
ابماي و استحي منها امن اسدر
يخوي اشلون اشوفنها ابيا عين
لو جتني او كالتلي الوعدوين
دخليني اموت اهنا يحسين
يخوي المستحا من شيمة الحر
كام احسين يبچي للصواوين
ينشف دمعته عن النساوين
خاف لنهن يفكدن علي احسين
او يكلن له عليمن هالدمع خر
او يلي تلقته تبچي اسكينه
تلكه عمي العباس وينه
شرب ماي او نسانا بما نسنه
العطش و اقلوبنا تلهب امن الحر
خرت دمعة احسين او تنحب
او قاللها او نار القلب تلهب
ابشاطي العلكمي عمچ امترب
كضي فرت تصيح الله و اكبر
شل اطرادها ابن احسين الاكبر
او خلي الخيل بالهامات تعثر
امصيت هلهلت له الخيل لولاح
عليها او صفكت له اطراف الارماح
او ركصت له السيوف ابروس الاقراح
او فوق الطوس دكت ضرب الاكشر
من هاشم امنتب موش ملفوف
ابوه احسين بالميدان موصوف
او جده حيدر الكرار معروف
او عمه الحسن و العباس الازهر
اهتز ابغيرة الله و افرع الراس
تبارك بالوجه و الدرع و الطاس
او سيفه الشعشعاني المرهب الناس
او بالخيل الطلايع ضيق البر
اشچم حران من غدارته نس
فهو ابن احسين ضرب السيف اله او بس
ابرمحه چم عجيد اصياح لبس
او خلاها ابجماجمها تعثر
تموج الخيل من يفتر عليها
چن الخيل عزراييل بيها
ذب هذا ورا او هذا لديها
مساميها و رمحه يلحق الفر
شباب و لا يهاب الموت طفاح
بسرج عالي طويل الظهر نفاح
ارضي السيف واطا شرط الارماح
اورد ايلوج بلسانه او يفغر
مض العطش بابن احسين الاكبر
او رد ايلوج بلسانه او يفغر
يصيح ابصوت فت كلبي او شعبني
يبوي كوم ليه العطش ضرني
يبوي درعي او طاسي بهضني
يبوي او نشفت اريا كي من الحر
يبوي شربة اميه لچبدي
ايتكوي ورد للميدان وحدي
يبوي فطر كلبي و حق جدي
العطش و الشمس و الميدان و الحر
يكله امنين اجيب الماي يا ابني
مهو حچيك بهض حيلي او شعبني
اوفت روحي او حمس چبدي او لسلبني
يبوي استخلف الله العمر و اصبر
يكله و الدمع بجري امن العين
يبعدي او بعد كل الناس يحسين
تقلي اصبر او قلبي صار نصين
اشلون اصبر يبوي و الصبر مر
حن احسين و يلي او سال دمعه
حنا ظهره علي ابنه او كسر ضلعه
دار ايده علي اطواكه يودعه
يشمه و العيون تسيل محمر
تسايل يا دمع لوداع الاكبر
يكلبي ذوب لوداعه او تفطر
يويلي من تلاكوا عند الوداع
امشابك طول لمن هووا للقاع
لاع ابن لبيه و الابولاع
علي ابنيه يويلي اوداع الاكشر
يشم احسين خذ ابنه او يحبه
او دمعه مثل دمع ابنه يصبه
و النار البكلب ابنه ابكلبه
يخفيها علي ابنه او نوب تظهر
يكله و الدمع بالعين دفاق
ابعبره امكسره و بقلب خفاق
يبويه او داعة الله هذا الفراق
يبويه اشبيدنه هذا المقدر
يبويه للسيوف اسدر او للزان
او لوح ابغاربه و شلش الميدان
يبويه اليوم مراوحك للجنان
او بالكوثر يبوي اليوم تفطر
تحسر ويل كلبي الجذب ونه
اومن الماي آه انكطع ظنه
عرف لن المنية دنت منه
خر دمعه او للميدان سدر
شبل احسين للميدان سدر
اوخلي الخيل بالهامات تعثر
سدرو الكون شابچ زان و اسيوف
نشاب او نبل و اسهام و احتوف
ما والله رجف كلبه امن الخوف
و لا وجهه من اشراكه تغير
رد اسيوفها و النبل و الزان
حطيبه و الكروم اوجوه نسوان
شبل طاوي او نفچ من شيب غيلان
او شاف الغنم بالمران تشتر
هز غدارته اوذب العمامه
نشر راسه اسم الله علي النشامه
خز اكلوبها او شرق الهامه
او لف راياتها و السرب نشر
روط زانته و الموت بيها
او صاح اركابها او حوم عليها
يا مبعد اهاليها عليها
وين اتفراوطير الموت يبحر
عكب ما شرق الهامات و الطاس
اجته ضربة العبدي علي الراس
ذبل و تواردوا بسيوفها الناس
شبك علمهر ويلي و المهر فر
علي ابن احسين يا كلبي تفطر
شبك علمهر ويلي و المهر فر
شبك علمهر لباله يوديه
لبوه احسين عن القوم يحميه
اويلي المهر للعدوان فربيه
و وچب آه بموسط العسكر
داروا بالسيوف عليه و الزان
مثل چتال سبع المات فرحان
عسي ابعيد البلا وليته العدوان
ارذال او بالمعايب دوم تفخر
هذا يكطع ابسيفه و ريده
او هذا بالخناجر فصل ايده
او هذا يغط من رمحه الحديده
ابخاصرته و هو يعالج او يفغر
ثكل بيه الطبر و تلوج روحه
او محد عرف غير الله اجروحه
دماياته علي احصانه سفوحه
لما خر ايهناديها اموذر
نده يحسين هذا الساع جدي
سكاني الماي و اروي عطش چبدي
يكول اسرع تراك اليوم عندي
اجاه ايصيح يا بني الله و اكبر
ويلي احسين صاح الله و اكبر
يبوي ليش هلنومه ابها الحر
كعد عنده او شافه امغمض العين
ابدمه سابح امترب الخدين
متواصل طبر و الراس نصين
حنا ظهره علي ابنيه او تحسر
يبويه كول منهو الشرق راسك
ينور العين من خمد انفاسك
يعكلي من نهب درعك او طاسك
يروحي اشلون اشوفنك امطبر
يبوي من عدل راسك او رجليك
او من غمص اعيونك و اسبل ايديك
ينور العين كل سيف وصل ليك
كطع كلي او لعند احشاي سدر
يبويه من سمع يمك ونيك
او من شبحت عند الموت عينك
للعشرين ما وصلن سنينك
او حاتفني عليك الدهر الا كشر
اريد امسح اجروحك و شم خدك
و حط صدري علي صدرك و وسدك
يبوي شوف لاجن حرم جدك
وحت زينب تصيح الله و اكبر
اجت زينب تصيح الله و اكبر
يعمه ليش ها النومه ابها الحر
هوت فوكه تشم خده او تحبه
او تطبق طبرة الراس او تعصبه
او تسفر زيج ثوبه تجس كلبه
لكت دمه من افواده يفور
يويلي ولولت و احنت ظهرها
تخمش اخدودها او تحلج شعرها
او تدق ابراسها و تلطم صدرها
او تنعي ابصوت طركلب الصخرطر
يشمس الكيض يليلهب و هجها
يبدر التم يلمطفي سرجها
يسم الخيل يلمچثر مرجها
اشلون امن السرج تنشلع و تخر
ينجم اسهيل يلحامي الشرايع
يا جرناس يمعذب البراجع
يشبل الموت يمسدر الكلابع
اشلون امسيت للنشاب مكور
ردها احسين للصيوان بالهم
او شاف الخيل دارت علمخيم
اولن ابن الحسن جسام مرزم
يصبح ابصوت عالي الله و اكبر
طلع جسام يصيح الله و اكبر
درخصني يعمي ما اكدر اصبر
بس شافه شبق فوكه او تباچوا
اختنكوا بالبواچي او ما تحاچوا
لمن غابت الروح او تتاچوا
علي التربان ويلي و الوكت حر
لما ابدت الروح ابعمه اوبيه
طلب جسام رخصه او ما يخليه
وقع ويلي يحب ايده و رجليه
در خصني يعمي ما اكدر اصبر
يكله ابكي لبن عمك تباريه
عليل او ما بقي غير النفس بيه
يعمي اخلافنا بلچن تسليه
و ظن هيهات يتسلي و يستر
تقلي اسدر يعمي للصواوين
امنقلك راد ليها چذب يحسين
ارد عنك دعلمني ابيا عين
اشوفنك علي الرمضا امطبر
يقله يا قمر بيتي يشعاع
يعمي او داعة الله هذا الوداع
ركب و ارزم و ذبها موش مرتاع
شهاب او يحرج الطاغي من يخر
عرض للحر جسام و اشهر
شهاب او يحرج الطاغي من يخر
جر السيف و الزانه نكثها
او طفح علي الملزومه او فرثها
جثث بالروس و الروس ابجثثها
اسم الله عليه خلاها تعثر
تبردق فوق مهره و قال يومي
او قال لزانته علي الخيل حومي
رفها و كال للرايات كومي
عن دربي و صيري اتياه بالبر
يخزعين الطليع و كال ثجل
ابظلمه و المذهب واج مشعل
من يلمح شعاع السيف يثول
حمام او من يشوف الطير يصجر
من يدني او عزرايين بيده
غيث و بصواعجها رعيده
كانوص او تلولح علي الصيده
ابظهر اشكر شمر قوشه امسفسر
انكص اشراك نعله او قام يلويه
و لزدي بوك اجا و السيف مخبيه
ضرب راسه او جاسم ما دري بيه
خر اوصاح يا عمي المشكر
علي ابن الحسن يا قلبي تفطر
خر اوصاح يا عمي المشكر
بس ما سمع حسه شرعبت بيه
چتل چتال جسام او سدر ليه
لقاه ايعالج او يبحث ابرجليه
يلوج ابروحه او دمه يفور
بچا اوناداه يا جاسم اشبيدي
يريت السيف كبلك حز وريدي
هان الكم تخلوني وحيدي
علي اخيمي يعمي الخيل تفتر
يعمي اشقالت من الطبر روحك
يجاسم ما تراويني اجروحك
لوان ابقي يعمي چنت انوحك
ابقلب مثل الغضا و ابدمع محمر
حط احسين صدره ابصدر جسام
شبك فوكه او شاله يم الخيام
صدره ابصدر عمه او خط بالجدام
بالتربان وا حسين ايتعثر
جابه او مدده ما بين اخوته
بچا عدهم يويلي و هم موته
بس ما سمعن النسوان صوته
اجت سكنه تصيح الله و اكبر
اجت سكنه تصيح الله و اكبر
يجاسم ليش هالنومه ابها الحر
عسي ابعيد البلا خدك علي القاع
يجاسم موش و كت الموت هساع
جاسم يا ابن عمي لو ان تنباع
ايماي العين چنت اشريك يا حر
عساهي ابرقبتك كل الخطيه
تخليني غريبه و اجنبيه
يا جسام عرس اقشر عليه
عريس او يزفونك امطبر
امبارك بين سبعين الف جابوك
ابدال الشمع بالنشاب زفوك
عن الحنه ابدم الراس حنوك
علي راسك ملبس نبل ينثر
يجاسم ريت هالطبرات بيه
يجاسم قوم ريت الموت ليه
صدق رايح يجاسم هاي هيه
تخليني اون الليل و اسهر
اجت زينب او دمع العين غدران
او صدت للخيم نادت النسوان
قومن جاي نلطم علي الشبان
تهاووا مثل مهوي النجم من خر
علي الشبان يا قلبي تفطر
تهاووا مثل مهوي النجم من خر
فرن واحده تندب ولدها
او وحده تندب اخوتها او سعدها
او وحده للولي اتهمش انجدها
او وحده اتصيح يا عمي المشكر
يا شبان ينجوم المخيم
يبدور اشرقت ويلي اببحردم
بالله يا هوي الغربي تنسم
بلچي اتفوخ عنهم جمرة الحر
تذعذع يا عذيبي علي الشبان
بالرسريس لا تنقل التربان
تراهي اتبب من النشاب و الزان
لا تعصف نهز الزان و تضر
غديتوا طبق يا شبان و احسين
ظل اوحيد بس ايدير بالعين
لمن شاف روحه ماله امعين
او شاف الخيل علي الصيوان تفتر
لكف صلب العرج ملس الحديده
روطها او غداها اعجود بيده
خاض الموت چن الموت عيده
عبوس او من يشوف الحرب يستر
ليش الموت الاحمر راغ و اصفر
اثاري احسين بالميدان يفتر
حليف السيف و البيرغ و ليفه
حلولك فوق راسه بس رفيفه
اشچم حر ان مدرع بس رجيفه
تسمعه و الحرب بالسيف محتر
من يكحم علي الليث ابعرينه
يجر يسراه و السيف ابيمينه
من يركا علي امتونه او يهينه
يعيش او بين اذان الموت يصفر
دق بالكاع رجله او غدت ظلمه
تموج او يجف بيها فوق عزمه
امروس ينضح الكترين سمه
تچف الناس كلها منه الشر
او يلي من وقف دون الخواتين
ينادي من يجاهد دون الحسين
طلع زين العباد امن الصواوين
يكون ابشيمته او بالمرض يعثر
اويلي علي العليل اطلع مصفر
عليل او مثل صلا الرمل مصفر
يصبح ابصوت تجري بيه كل عين
يعمه اسلاح اجاهد دون الحسين
يعمه بعد ابوي وجوهنا وين
و ام چلثوم من بعده تعثر
اهنا يا ابني تكله دسدر اردود
تري كلبي يعمه خزن اچبود
اشوفك يا ابن اخويه اولوعتي تزود
او نار احسين بين احشاي تسعر
صاح احسين يا ام چلثوم وديه
يخوي ابني شعب كلبي درديه
مهو روحي ابهذا السيف لا فديه
او نور العين و لفركاه ما اكدر
يبوي انت الولي للناس بعدي
يبوي انت البيدك حكم جدي
يبوي انشوفتك فتت چبدي
سدر و دموعه ابعينه تغرغر
رده احسين للخيمه او عينه
تسح ادموعها او ينده اسكينه
يبوي ابن ابوچ الطفل وينه
اودعه او عبرته ابصدره تكسر
طفل احسين ظامي و الوكت حر
اويلي امن العطش چبده تفطر
تكله الطفل راح اللون عنه
يبويه ما بكت بالطفل ونه
جف دمعه اوجف اللبن عنه
او ظل يلوج بلسانه او يفغر
يبويه ما ابعيني دمع واسجيه
لو يرضي الموت بيه الساع لفديه
يبوي شوف چي ساوي العطش بيه
يبويه امن العطش چبدي تفطر
كامت شالته اوجت الوليها
فك اعوينته يبحر عليها
تخيل جايبه ميه بديها
شاله احسين و دموعه تنثر
كامت تستدير اعيون طفله
شبح عين لبوه او عين لهله
آيس شاف ميه ما حصله
رد غمض اعويناته او سكر
شمه او حبه ابصدره او خده
او چبد احسين يابس مثل چبده
يبويه ما بعد للعيش رده
اهو ايحاچيه اولن سهم المقدر
طاح الطفل للكاع او تعفر
او دمه مثل ماي العين فجر
تلكي احسين دم الطفل بيده
اشحال اليچتل ابحضنه وليده
سال او ترس چفه من وريده
او ذبه للسما او للقاع ما خر
اويلي من لفت سكنه تنادي
يبويه العطش ها الفتت افوادي
صدت لن اخوها الطفل غادي
يلولح ركبته او دمه يفور
يبويه ذاب چبدي او چبدة امه
دخليني اودعنه و شمه
يبويه ليش ما تسجيه دمه
بلچن چبدته تبرد امن الحر
يخويه عون من حبك او شمك
يخويه عون من راواك لمك
لغسلنك يخويه ابفيض دمك
او كبرك بالكلب يا خوي لحفر
كام احسين يمشي يم الانصار
وقف يمهم او چبده امن العطش نار
نده عباس خويه و الدمع فار
يخويه كوم لينه الساع و احضر
ابوفاضل دكوم اساع و احضر
او شوف الخيل عالصيوان تفتر
يخويه ليش هالنومه الطويله
يخويه الطفل عكبك طال ليله
يخوي ما چنت تسمع عويله
يلوج امن العطش لمن كضي اوخر
يخويه آيست سكنه امن الماي
تجي يمي ذليله او توكف احذاي
يخويه من العطش رادت تجي وياي
او تكلك وين وعدك يا مشكر
يخويه مادرت لنك رميه
و هي ابر جواك تسجيها اميه
يخويه امنين اجت ليك المنيه
او تكضي بالعطش و السيف و الحر
يخويه ليش هالساعه عفتني
غبت عني يخويه او ضيعتني
مهو افرا كك شعب كلبي او فتني
او نارك بالقلب يا خوي تسعر
رد و اعياله امن العطش يومن
او صاح ابصوت للتوديع كومن
مثل سرب الكطا كامن يحومن
تطيح اعليه وحدتهن او تعثر
علي اوداع الحسين الكلب محتر
يكلبي ذوب لوداعه او تفطر
اجت زينب او باجي الحرم يمه
او صارت للوداع اعليه حنه
يشم سكنه و هي كامت تشمه
يحبها و الدمع ليلو ايتنثر
يبوي ايطول من بعدي و نينچ
او مثل النيب چن اسمع حنينچ
يبوي لا تشوفيني ابعينچ
اخافن ينخطف لونچ او يصفر
صد الباجي اعياله ابعينه
بچن عنده او نادن ياولينه
عسن للغاضرية لا لفينه
اولا بينا يوالينه تحير
اجت زينب يوصيها بلعيال
يوصيها ابعليله او كل الاطفال
شاف الدمع فوق خدودها سال
تكله علي افراكك ما اكدر اصبر
كام ايهون افراكه عليها
او بين بعد عين الله وليها
عكب ما جاب كل الصبر ليها
ركب غوجه او للميدان سدر
ليش الموت الاحمر راغ و اصفر
اثاري احسين للميدان سدر
سدر و اعلن ابحد السيف ناره
او لعنان السما ثور شراره
خلي الليث ما يندل فراره
يفر ويجيه موت امنين ما فر
تفر اكرومها او يحطم عليها
يحوم ابها او يحوم الموت بيها
چم حران ذبه عند اديها
او خلي الخيل بالهامات تعثر
فل اجموعها اولف الروايا
ابسيف رضع من ثدي المنايا
شق الزلم و الخيل السبايا
چدسها اوذب الازرق فوق الاحمر
صك الخيل و ادعي الخيل طشار
ابسيف للدرع و الطوس فزار
رو العود سوي الصار ما صار
او چبده امن العطش ويلي تفطر
دار العسكر علي احسين يا حيف
ناس بالرماح او ناس بالسيف
يشبه دورها علي الليث المخيف
بياض العين بصبيها ايتدور
دار العسكر علي احسين و افتر
او صار اشبيح للنشاب مكور
تلكي انبالها احسين بوريده
نوب بالضلوع او نوب بيده
تلايم غيمها و اثجل رعيده
او بالزانات فوق احسين يمطر
ثكل ما يندري ابنشابها امنين
يجيه اوزانها يخطف علي احسين
سهم بيده او سهم بحاجب العين
يويلي و اغرفت روحه امن الحر
صار اشبيح بيه امن المنيه
الف نبله يويلي او تسع ميه
و كف تبة نبل بالغاضريه
او زور ارماح شابچ عيب ينطر
او چب يستريح احسين ساعه
ضعف حيله او ثكل بالسيف باعه
رن الحجر من وجهه ابشعاعه
او دمه مثل ماي العين فجر
شال احسين ثوبه يمسح الدم
اولن سهم المحدد ناجع ابسم
ابقلبه وقع لا وخر او جدم
هوي و اظلم هواها و السما احمر
ليش اظلم هواها و السما احمر
اثاري احسين من فوق المهر خر
يا ارضنا اليوم ميدي او يا سمامور
او بعد احسين يا ماي البحر غور
يا كلبي دذوب او يا دمع فور
او يا چبدي علي افراكه تفطر
هوي و المهر قام ايحوم دونه
يحامي عن وليه من يجونه
خاف الكوم لنهم يا خذونه
او يركبه غير خياله المشكر
عكب ما آيس الطماع منه
رد روعه اوراح الخوف عنه
صهل و اعول او حن او جذب ونه
سحب صرعه او لعند احسين سدر
اجنح فوق راعيه او شمه
او صار اظلال دون الشمس يمه
مرغ وجهه او ناصيته ابدمه
او نادي بالظليمه او للخيم فر
بچت سكنه او نادت بالمذله
يعمه المهر حط بالكلب عله
طلعت صارخه زينب تكله
يمهر احسين وين احسينا خر
يمهر احسين وين احسينا خر
مالك روعت كلبي يمكدر
يمهر احسين وين احسين كلي
اشوفك جيتني تصهل ابذلي
خلاف احسين كلي وين اولي
او مالك روعت كلبي يمكدر
يمهر احسين كلي عن وليي
بعد فيه يخايب بيش افيي
چم اصواب كلي ابكلب اخيي
او من يا جرح دمه ايفور اكثر
اهنا كلي يصير اعلاج لحسين
افت كلبي و ذر جرح الكلب زين
و نكط فوق جرحه ابدمعة العين
بلچي اصواب اخويه احسين يخدر
كام ايهمش اصفاحه ابسنه
يدق بالكاع رجله او يجرونه
و باب الخيم رجليه ثنه
دق راسه او سالت دمعته اوخر
فرن يمه ايجلبن اجروحه
ابكلب خافج او عبره سفوحه
لكنه ايلوج و يعالج ابروحه
يون و صواب كلبه دم يفور
اجت زينب تصيح الله و اكبر
يخوي ليش هالنومه ابها الحر
بچت زينب او نادت يا وليي
ينور العين يا عكلي او خيي
يخوي الصبر من بعدك امعيي
علي او نار فكدك دوم تسعر
يخوي من ضرب راسك ابسيفه
طعن كلبك ابرمحه و خذ حيفه
او ما خلا ابروحك بس طريفه
خفيه او شافها الموت المكدر
يخوي من سمعت المهر يصهل
تخيلتك ابجود الماي مجبل
اصد لن المهر محرب او معول
جالب عدته و السرج يصفر
علي امصابك لحرم لذة العيش
بعد فكدك يخوي احسين ما عيش
يخوي اصواب كلمن مات بالريش
او جرحك بالقلب يحسين يسعر
علي امصابك لجيمن دوم نوحي
يعيني بالدموع اليوم طيحي
امصابك يا عيوني شعب روحي
لونه بالصخر ذاب او تفسر
تصيح ابصوتها يحسين وينك
يخوي جاوب او صدلي ابعينك
يخويه ذاب كلبي من ونينك
يخويه موش كلبي صخر مرمر
فك عينه اوزركها او شبح ليها
اوحن او خرت ادموعه عليها
لما صدت لعد دمعة وليها
ليلو فوق جرحه يجلب احمر
فك احسين عينه و الدمع خر
ليلو فوق جرحه يجلب احمر
ناداها ابضعيف الصوت يختي
مهو حچيچ شعب كلبي دسكتي
ينور العين خليني ابمهجتي
اعالجها تري كلبي تمرمر
بچت عنده او صاحت له يعكلي
يروحي او نور وجهي او باجي اهلي
يخوي احسين شتهيس دكلي
يخويه يا صواب اليوجع اكثر
يكلها اصواب البوجهي يضدني
و لبراسي حمس چبدي او فتني
و لبضلعي بهض حيلي او ضهدني
و لبكلبي يخويه يوجع اكثر
يخويه يابس امن العطش چبدي
يخويه و الترابه احركت زندي
يخويه و الشمس احركت خدي
دفييلي ابردن ثوبچ امن الحر
ويه ما احب سكنه تجيني
تشوف اجروحي او تسمع ونيني
مالي كلب اشوفنها ابعيني
ذليله مالها والي الينغر
يخويه لا تليعي الكلب بالله
و ببنيي علي هلة هالله
يخويه من بعد عيني الكم الله
و ذكريني او كل امصاب يزغر
يحاچيها او تصب عينه ادموعه
لن قلبه انخفي و احنت اضلوعه
غمض عينه او صارت بيه موعه
هوت اودمعها اعليه ينثر
تشم احسين و تجلب ابجرحه
اولن الشمر يدفعها ابرمحه
كومي يو اذبحچ فوق ذبحه
و خليها ابعمر الدهر تذكر
بالله يا شمر عنه دوخر
اذبحني و خل اخوي احسين و اسدر
تكله يا شمر بالله دخليه
او ماشافه امن الطبرات ييزيه
تشوف ايلوج ما غير النفس بيه
او عينه نوب يسبحها او تغمر
دكلي يا كثر خالي امن الجروح
تحط سيفك يخايب و الدم ايفوح
طبره فوق طبره تشعب الروح
يشوغ الكلب من عدها او يفغر
يخايب خلي اخويه احسين ساعه
اغمضله و مد للموت باعه
مهو شمامة الحلوه اطباعه
دخلي ابراح روح احسين تظهر
يخويه بيش اضمك وين اوديك
يخويه اشلون اصدعنك و خليك
تراني اتحيرت يا مهجتي بيك
يخويه بيش اظللك من الحر
هوت يمه تشم كسر البضلعه
اخوي الما طبع يشبه الطبعه
غابت روحه او فزت تودعه
اولن راسه بلملوث ينور
راس احسين فوق الرمح مسفر
مثل البدر بالظلمه ينور
لمن شافته صفكت بديها
او شكت ثوبها ويلي عليها
ما نلام من شافت وليها
فوق الرمح راسه ايلوح بالبر
سالت عينها بدموعها اعليه
او شالت راسها و تلفتت ليه
خفق ويلي كلبها و اومت اعليه
او صاحت باچيه ابصوت امذعر
يسور المرمر الماله مصاعيد
يصل الرمل يمنفر العرابيد
يطير السعد يمعذب الصياييد
حاطت بيه فوق الرمح و كر
عسي ابعيد البلا راسك امعلق
يخوي اوجثتك بكفره سملق
او كلب اختك يخوي اساع خفق
اوطار اوحام عد راسك او فرفر
اويلي اتلا كفو اراسك بلرماح
او شيبك آه تلعب بيه الارياح
و مصوت عدونا بالغنا صاح
ابذلنه امكيف او بالنصر مستر
يا شيال راس احسين ريض
جيم ابراس اخيي لا تعرض
شوف الدمع من عيني يفيض
او نار الكلب لفراقه تسعر
يا شيال راس احسين كصر
تري كلبي علي افراقه تفطر
يشايل راس حامينه اولينه
ريض خلي اتودعه اسكينه
ليش احسين ساچت عن ونينه
قلي تعب يوجرحه تخدر
يا شيال راسه لا تلوحه
او هبط عن بقايا الروس رمحه
اخاف ايفوت ريح الهوي ابجرحه
و اصوابه عليه ايكوم يسعر
يا شيال راس احسين سدره
رده الجثة او و سده ابكبره
يخايب شفت هاذي كبل تجره
ايقفره جثته او راسه امسير
يا شيال نعشه لا توجعه
اخافن تلچم جرح البضلعه
دريض لي اريد اسا اودعه
او هذا افرا كنا ما بعد مسدر
يا شيال نعش المات مظلوم
علي الشاطي او عن الماي محروم
تحوم اكلوبنا فوق النعش حوم
اخوي الطاح مثل النجم من خر
يا شيال نعش احسين بهداي
او بالله دحط تابوته علي الماي
اريد او كف و غسلنه ابيمناي
و شوف اصواب كلبه ما تغير
رفع بعنادها راسه او شاله
او خيب زينب او يتم اطفاله
بسما شاله او شافوا عياله
اجت سكنه تصيح الله و اكبر
اجت سكنه تصيح الله و اكبر
يبويه ليش هلنومه ابها الحر
تصيح ابصوت يفجع من يسمعه
يفت كلبه و يرض صدره او ضلعه
يفيض كل عدو عليه دمعه
يبوي ليش هلنومه ابها الحر
يبوي ليش ما تنغر عليه
... العزيز الهاي هيه
يبوي اسا عدوي مت بيه
ذليله ايشوفني ما بين عسكر
يبوي انروح كل احنا فداياك
اخذني للقبر يحسين وياك
اهي غيبة يبوي وا كعد اتناك
و كولن سافر او يومين يسدر
يبويه اللي وكع من بين اديه
چتل عطشان ما تشرب ميه
يبويه ريت هلنومه هنيه
او من بعدك يريت الناس تسهر
علي امصابك يبوي لصب دمعي
و خلي اعليك نوح الليل طبعي
لحرم ما يجيس الكاع ضلعي
و لا كلبي بعد فركاك يستر
يبويه كول لا تخفي عليه
هذي روحتك يوبعد جيه
يبوي انچان رايح هاي هيه
اخذني او ياك عنك مقدر اصبر
يبويه من شفت مهرك لقاني
ذاب الكلب و انخطفت الواني
يبوي ايعود لي بيكم زماني
و شوف الدهر بيكم يرديزهر
يبويه بادحيلي و حق جدك
عسن للكاع خدي دون خدك
يبويه شال راس الدين بعدك
و الدنيا اظلمت و الكون مغبر
بچت زينب او صدت للمدينه
يهلنا احسينكم كطعوت و تينه
اشو نوماتكم صارت سنينه
دكوموا يال هاشم و الهضم مر
دكوموا يال هاشم و الهضم مر
شوفوا حسين عشاطي امطبر
تناديهم او حادي الظعن طوح
تكلهم ياهلي و الدمع يسفح
دخلي خيلكم بالصرع تطفح
او شوفوا حسين عشاطي امطبر
يهلنا احسينكم رضوا اضلوعه
او شاف الموت روعه بعد روعه
يصد لعياله او تسچب ادموعه
يخافنها بعد عينه تيسر
يهلنا احسينكم ذبحو انصاره
ابوفاضل تكور بالمعاره
وج ابقلب اخوه احسين ناره
دمع عينه علي خده تحدر
يهلنا احسينكم نشفت ارياقه
اوراح ابنه اوهد حيله افراقه
اوعن ورده امعوج الموت عاقه
او عالجها او دون العلقمي خر
يجدي قوم هذا احسين مذبوح
علي الشاطي او علي التربان مطروح
يجدي ما بقت له من الطعن روح
يجدي قلب اخوي احسين فطر
يجدي قلب اخوي احسين فطر
عالجها اودون العلقمي خر
يجدي الرمح بفاده تثنه
يجدي او بالوجه للسيف رنه
يجدي او شيبه بدمه تحنه
يجدي او بالرمل خده تعفر
يجدي مات محد وقف دونه
او لا نغار غمضله اعيونه
وحيد ايعالج او منخطف لونه
و لا واحد ابحلقه ماي يقطر
يجدي مات محد ممدد ايديه
و لا واحد يجدي عدل رجليه
يعالج بالشمس محد قرب ليه
يحطله اظلال يا جدي امن الحر
تناديهم يهلنا اولا لفوها
و لا جدها يجاوبها و لابوها
حنت و انقطع ظنها من اخوها
او شافت علخيم صول العسكر
اويلي علخيم صول العسكر
وجها ابنار و الدخان كبر
صال اونفج النسوان عنه
نفر كل طفل مذعور منه
صار اصياحها و النوح فنه
و لا واحد يذب عنها او ينغر
نهب ما چان بالصيوان موجود
او ثجل الحسين ويلي صار فرهود
و لا خلا بخيمتهم و لا عود
حرقها او لعند الخيم سدر
سلب ما چان علي النسوان موجود
بقت وحده علي اخوها بروحها تجود
دعاها بين مطروده و مطرود
تفر هذي او هذي ابذيچ تعثر
ابسوطه يضرب اسكينه او يردها
تشقف بيدها يكسر زندها
تجي زينب تخلصها او يردها
لما سوطه ابمتن زينب تكسر
چم مخدره ضيع دربها
او چم مذهولة روع قلبها
او چم مذعورة ابسوطه ضربها
او نفجها الكتر الكتر بالبر
يحيدر قوم لينا اساع و احضر
او شوف الخيل بين الخيم تفتر
لعتب المرتضي و اچثر اعتابه
و هيلن للتراب علي اعتابه
اندبه و انتحب و اوقف ببابه
و قله اليوم يومك يا غضنفر
لون الليث ابونا اليوم يدري
اخوي احسين راسه اشلون مبري
لفاني او دمعتي اعلي الوجن تذري
فكنا من السبي اولا تعذر
يصنديد الحرب يمخيف الاسباع
يشيال الحمل لوطاح بالقاع
اخبرك بالحرم هل راحن اضياع
سبايا او بالردن ويلي تستر
يسلبها العدو او يشتم وليها
او جاير بالضرب ويلي عليها
تهبط راسها و تشقف بديها
دمعها يسيل علي الوجنات محمر
للسيد عبدالمنعم رحمه الله تعالي
و نهض يكشاف الكروب
يا بود الحسن ياداحي البوب
يسر القضا يا محنة ايوب
يمن دوم بالشدات مندوب
تري ابنك ابحد السيف مضروب
او شيبه بدم النحر مخضوب
او راسه براس الرمح منصوب
او سجادكم بالقيد مشحوب
او نسوانكم بين الشعوب
سبايا او منها القلب مرعوب
چيف الحراير و الركوب
دنهض اورد العتب و النوب
يبحر العلوم اوعفة الذيل
يصوام يا كوام بالليل
او يقرآن تحريما و تحليل
او يلاهوت تصعيد او تنزيل
او يضرغام لو اكبل علي الخيل
يخلي السيوف الهاصليل
يريتك عدل يوم الرحيل
تنظر بناتك و العليل
سبايا علي النوق المهازيل
او يلاه لو ينفع الويل
علي اهل النجابه و البهاليل
مامش ولي بس العليل
امن الكيددم ساكه يسيل
مهوا بن النجابه و البهاليل
يجمال ريض لا تسبح حيل
و الظهر كيل لا تشيل
تصلي الشمس و احنا مد اليل
او لوصار ممشاكم ابليل
باروا المحامل لا تميل
او حفظوها من طيحة الليل
لو هلهلت و دموعها تسيل
و تبرهجت من شافت الخيل
و الكلب طار من الصهيل
و جعدوا صدرها يا بهاليل
او يشيالة الحمل الثجيل
او ينقالت الرمح الطويل
كوموا لزينب و المداليل
و ابروالهم من عثرة الليل
انوي ضعنهم علمشيل
او دنوالهم نوق المهازيل
غرايب اوما عدهم رياجيل
خلصوا چتل بس العليل
امكيدا و بس فنه العويل
ينفطر الفآد او ينحل الحيل
لو تشوفنا من غارت الخيل
او فرت امن خيمها المداليل
لكت كومها كلهم مچاتيل
ردت اوفنها النوح و الويل
و اشحالها من هود الليل
اوباتت حريم ابلار يا جيل
لو نادوا يحادي اضعونهم شيل
خذوهم علي النوق المهازيل
او چفيل الحرم و جعان و عليل
امكيد ابكيد ثجيل
حيدر يبويه ما تجينه
و تشوفنا اشلون انسبينه
سبايا او نتستر بدينه
و الناس تتفرج علينه
او زين العباد امقيدينه
يبچي او يتلفت ابعينه
و يكول ابوي احسين وينه
انت انصبت و احنا انسبينه
دقعد يعزنا يا مچنه
يراس الفراسه و المحنه
محد تري يبري الضعنه
او كلبي النوايب قطعنه
اوراسي المصايب شبينه
لحقن علي عكلي خذنه
ابفيض النحر شيبك تحنه
يا طارشي احتزم عجلان
لاهل المعالي او رفعة الشان
او وصل علي خيال الحصان
او حشم بني هاشم و عدنان
او كلهم احسين اندبح عطشان
او تلعب عليه الخيل ميدان
او راسه يلوح ابراس السنان
حرمكم سبايا بين عدوان
اخوي احتزم و الغوج شدها
او عليها اعتلا اليرهب مهدها
تچنه او علي الظلمة لكدها
او ضيع تحت صدره كلدها
او كل غارة التجبل يردها
و الخيل خلاها ابعددها
اوضيع تحت صدره كلدها
و امروج محمرة بردها
تخسون ما زينب وحدها
وخوها النفل و اجف بحدها
يا سور زينب يا ضمدها
يحسين يا عز المخيم
او يضرغام ياذر الحرم
او يسراجنا بالليل الاظلم
او يسو رشمخ مالاش سلم
او يحر علي الصيده معلم
تراهي انسبت زينب او چلثم
و النار وجوها بالخيم
ترضي يبعد الخال و العم
يسوقونا سوق الغنم
الخيل اجتنا مثل الغيوم
و تعزلت صمصوم صمصوم
او تسكط كطعها امساقط انجوم
كوموالها يسباع يقروم
اوخلوا جثثها طعمة الحوم
مركاضكم بالكون معلوم
فكوا يسر زينب او چلثوم
سلبوا معاصبنا و الهدوم
بسكم علي التربان هلنوم
تسرجون من لفح السموم
للشيح حسين الدجيلي رحمه الله
الخيل اجتنا للبيوت
او تبرج عددها من الرخوت
ركعديبن بالضيج منعوت
اويحد الصفيحة التكطر الموت
ياچوسج بحر يا دركت الحوت
يريح الشمال المجلل اغتوت
امسعر الحرب يا نار برهوت
ترضي علي جثتك نفوت
لا ماي ويانا و لا قوت
و ابنك علي بالحبل مسبوت
يحسين يا سور منيع
يجلمود يمثلم الكطاطيع
يا ردام يمچسكر المصاريع
يرواغ يمعذب المداريع
خواتك مشن عكبك مفازيع
سبايا او علي النوق المضاليع
و الحرم بعد ارجالها تضيع
خلصوا چتل حتي المراضيع
مطاعين علرمضا مصاريع
للسيد عبد المنعم
الخيل اجت و تعدت الحد
و اخيامنا مابيهن احد
دشدله علي حلو المشد
او حورب لغاتك يلعبد
لابو الفضل هساع يكعد
كله الحسين اخوك مفرد
ايدير عينه او ماله احد
بسك علي الرمضا امدد
دكعد يبعد الخال و الجد
يا كصوره او بالضيج عيال
او ياحيد يا شيال الاثقال
او يطود ثبت لوصار زلزال
او يبحر علي الوديان سيال
او يا ميمر حاطت به انذال
كطعوا يمينه و الشمال
فداك السلف و اختك و لعيال
يعين الطليعه يا مجدم
يا خواض بحر الموت لوزم
من شاف عج الخيل درهم
و بغارب البارع تلملم
او علي تبة النشاب درعم
نصا المشرعه و الريج علكم
ترسها اولاح الغوج و ارزم
اودارت عليه الله يعلم
و بغير حفظ الماي ما هم
شراها ابيمينه اوما تندم
و اثني بيساره اولا انهضم
فروا جربته ويلي ابسهم
و كف و كفة المغبون و اكظم
او سكنه تربه اباب الخيم
متدري بعمها سبح بالدم
او يلي علي ابوفاضل تخذم
لبعضهم
مصديت روس اهلي علي ارماح
او حس المحورب بالظعن صاح
لخيال ويانا و لا سلاح
بس راس اخوي علي الرمح لاح
يا سايجه للظعن رده
امسا المسا و احسين وحده
لحد اولا ما حود عنده
و خوته طبق نومه ابحده
مچاتيل كلهم فرد مده
وين الصديج البذل جهده
و اسريع يوصل لعد جده
يكله تري زينب بشده
وين الصديج اليحن كلبه
علينا او يسج ابليل دربه
لارض الغري و يهيل تربه
يكله العلي زينب ابكربه
و اعيونها لمجيك تربه
غريبه و صفت بديار غربه
زمزم ضعنا بليل ويده
او ولينا بكي عاري عضيده
ظامي الخشا او دامي وريده
دكعد يحر الروس صيده
اخبرك بكت زينب وحيده
بس العليل اضل شريده
يصفج وسف يحسين بيده
للشيخ محمد النقاش
يراچب الكور المضمر
او ساري كبل طرة فجر
لا يمنعك بر او بحر
عرج لبوي الليث حيدر
كله يجرد للمشهر
سلمان وينه او وين ابوذر
حمزه او عقيل اوين جعفر
وين الدحاها لباب خيبر
تري احسين عن سرجه اتقنطر
و الشمر حزمنه النحر
انچان ما تلفي يحيدر
يسيرون ببناتك يسر
لودي عتب لاهلي الجفوني
او بديار غربه ضيعوني
ساكوا ضعنهم ما تنوني
ماني العزيزة و ارخصوني
دسحي عليهم يا عيوني
لو كف علي درب الظعون
و اسايل اليرحون و يجون
حرمه او غريبه لا تكطعون
او لدياركم يمته تعودون
تري احنا ابمذله او هظم و الهون
و اطفالكم يمي يلوعون
يشعبون كلبي من يومون
عطاشا اومني ماي يردون
بناتك يعيني مرمرني
عطاشا او يردن ماي مني
او صار البچا و النوح فني
مني اتمرمرت من صغر سني
او راحوا هلي بالطبق عني
في حق العباس (ع)
نجادي الظعن عباس مربيه
مالي كلب امشي و خليه
اخوي الشفيه و اعتب عليه
او كله الظعن منه اليباريه
بس العليل الكيد ماذيه
هذا الخفت منه طحت بيه
للسيد عبد المنعم
لو هلهلت و ادموعها نار
و الشمس غابت تحت الغبار
ندهوا بني هاشم و الانصار
و ندهوا علي حيدر الكرار
خذونا سبايا اصغار و كبار
او من بعدكم ضكنا المرار
لغيره
يا طارشي دنهض او كوم
او وصل علي جلاي الهموم
و خبره ابعزيزه احسين مهظوم
كضي بكربلا من الماي محروم
اوراسه علي الميال مزموم
و خبره تري زينب و چلثوم
و كله عليهم دارت الكوم
نريد الزتت منك يضرغام
ساق الظعن و نووا علي الشام
يسير الظعن و الروس جدام
حريم البليا رجال تنضام
و اهل الحميه كلهم نيام
بعدكم عسن العمر لادام
اويلاه من غدرات الايام
وين الذي ينكل سلامي
لعدو الدي او باجي عمامي
او يحچيلهم زود اهتضامي
راح الذي عنا يحامي
نوحي علي المذبوح ضامي
وين الصديج اليحن كلبه
علينا او يسج ابليل دربه
لرض الغري و يهيل تربه
يكله العلي زينب ابكربه
و اعيونها لمجيك تربه
غريبه او صفت بديار غربه
زمزم ضعنا ابليل مسراه
او لحد يهلنا الظعن باراه
او ولينا بكي و العين ترعاه
جسمه خضيب او لحد احذاه
اولا من شفيج جاه و اراه
بس الوحش بالليل ينعاه
اويلاه يا روحي اويلاه
هيهات مثل احسين نلكاه
للسيد عبد المنعم
لو هلهلت و الريح دايب
و معلمه الكثر المصايب
عليها جرت كل النوايب
تهتف بخوها و الكرايب
تكله الحرم ظلن غرايب
او تسري بهن خوص الركايب
خاب الرجا الماچان خايب
شنهو الرجا واحسين غايب
طوح الحادي و الظعن شال
و اتصارخت نسوان و اطفال
چي بصرتك خوي بلعيال
او منهو اليعدل الحمل لو مال
غريبه او معرف رچب الجمال
راسك براس الرمح ينشال
امصابك يهدم روس الجبال
ساق الظعن و النوق عجف
او عيني تصدو الكلب يرجف
اولوني يبو سكنه انخطف
و انا مخدره يحسين معرف
و الدرب يا ابن امي چلف
و ابنك علي الناكه مچتف
او من ذوب كلبه العين تذرف
او راسك ابراس اسنان مشرف
مثل البدر و الليل مسدف
و كلوبنا فوكه ترفرف
يحسين يا تالي السلف
يردونا عنك انشيل
واحنا حريم ابلا رياجيل
چي بصرتك لوهود الليل
او چفيل الحرم و جعان وا عليل
امكيد اوبس فنه العويل
يفطر الفاد او ينحل الحيل
تمنيت ابوالحسنين بدري
و يشوف دم احسين يجري
او حادي ضعنا كام يسري
مني اتمرمرت و انهتك ستري
لا تعتذر و تكول مدري
بالسوط بويه انفصم ظهري
انا اشلون يا مظلوم صبري
اشوفك كطيع الراس مبري
ابيا حال ما تدرون صرنه
سبايا ابستر الروس حرنه
شمسنا اكسفت و اظلم بدرنه
او من هاي ما يجبر كسرنه
ردنا نودعه اولا كدرنه
طردنا الشمر عنه او نهرنه
منهو اليزتتنا البلدنه
محنا حرم و اطفال عدنه
مهي امناسبه نمشي وحدنا
سمعت المنادي و الصدر حن
يسكنه لعند احسين دمشن
او شدن احزام او زين الطمن
نغسله او نفصل له چفن
او نحفر كبر لحسين ندفن
يا هو المثل كلبي تمحن
سمعت المنادي او كمت ليه
لكيت الشمر يفتر عليه
حرمه او غريبه او لكدر عليه
و جروح جسمه موجره بيه
يحق لي العمر بالنوح اكضيه
او لو ضاق خلكي من يسليه
سمعت الفرس تصهل او جيته
عليه الشمر يفتر لكيته
لولي عزم بيدي حميته
مني جيت عد راسه او نخيته
او شميت نحره او ودعيته
ابحال اليتامي اخبريته
احسين من يستر ثنيته
برضاك يورغم عليك
يجرني الشمر من بين ايديك
انا اصرخ و دير العين ليك
انا ادري ابحميتك ما تخليك
اشو شيمتك ما ثورت بيك
خانن يخويه بيك رجليك
معذوريل حزواور يديك
اناجيت للعركه او ندهته
اوراعي المروه تعذر اخته
لكيت الشمر ثاني ركبته
علي صدر اخيي او حزر كبته
عيني العما اولاچان شفته
امخضب ابدمه اولا عرفته
بنفسي يخوي احسين اداويك
وجيب الدوا يحسين و اسجيك
بلچن تطيب العلة البيك
و جعدك يبوسكنه و حاچيك
وعد مصايبنا وبچيك
لون تفتدي بالروح لفديك
اريد انشدچ يا دار عنهم
اهلي حموله اشظل منهم
كالت هلچ عني تعدوا
اولالي خبراي ارض مدوا
يا دراهم و الله لواطيچ
و احلف يمين الما اطب ليچ
لمن يجي يا دار راعيچ
يا دارهم چنت زهيه
او چانت قناديلچ مضيه
اشو موحشه امسيتي عليه
لحكت علي الغاضريه
اولا خلت امن اهلي تچيه
اشحال الذي فاجد وليه
ما حيلة المهدوم فيه
ابچي او سحي الدمع يا عين
علي اهل الشيم سبعين و اثنين
و خوتي و عمامي غير الحسين
او شبان ممن غير الجنين
امسوا علي الرمضا مطاعين
هذي جثثهم روسهم وين
كلهم تفانوا بس نساوين
امنين اجتنا كربلا امنين
يبات الكلب يحسين محموس
علي البلخلا باتوا بلا روس
كومي او هلي كلهم اضروس
او عمامي اليبذلون النفوس
و خوي المشكر چسب ناموس
لكف جربته او عنا علي الشوس
او غدي ايدوس بذيال الدرع دوس
دكعد يبعد اهلي يمحروس
يبوي الطفل للماي اخذته
بسهم العدا مذبوح جبته
شنهو الذنب خويه العملته
و الماي حاضر ما شربته
لسانك علي صدرك دلعته
يبوي الطفل عني دغطيه
اولالي كلب يحسين اصدليه
اشوفه ذيبح اوماد رجليه
لدري يبويه چنت اخليه
خفت العطش يلحق عليه
او كلتلك لعند الماي وديه
اشوف الخفت منه طحت بيه
للسيد ميرزا
يوم النزلنه الغاضريات
قلبي اعلي اخوتي بالوجل بات
جتنا بني كوفان دفعات
رايات تتري باثر رايات
نزلوا يخويه اعلي المسنات
لزموا علينه ماي الفرات
عباس مدعي اخيولها اشتات
چدسها او تتعثر ابها مات
لمن خلص علماي طبرات
الخيل اجت لينه مغاوير
كلها مداريع او مشاهير
بالخيم بس نسوه مذاعير
شافو لمع ذيچ الغدادير
فرن لخوهن ظنن ايجير
شافنه نايم مستحير
من علته ما هو جدير
و العسكر الجاهن چثير
اعلي الخيم كلها مستدير
لوبن سعد آمر بالمسير
شال ابوكت حر الهجير
سج ابدرب كله عواثير
و الجري اعلينا ابدما يصير
في وصية الحسين (ع) لزينب (ع)
اوصيچ يا زينب بالعيال
لوطوح الحادي بالجمال
عينچ وحطيها امن الاطفال
تدريهم اربات الدلال
اوعن الشمس يرد الهم اظلال
و نظري علي السجاد لومال
ادري عليل او صار بيحال
يحسين توصيني بالايتام
حرمه اوطحت ما بين ظلام
اولالي عشيره اولاعمام
و النوق جابوها اللئام
ملهن وطا اولا بيهن ازمام
شباري الوكع يلي غفي اونام
او درينه ليالي ايصير و ايام
و الدرب تدري ايريد له ازلام
تباري الظعنه ورا اوجدام
ترضه يبو الشيمه يضرغام
خواتك سبايه مشن للشام
تمنيت ابوي اليوم يظهر
للغاضريه وياه الاشتر
او حمزه اويجي الطيار جعفر
او سلمان و المقداد يحظر
او عمار يتلاهم و بوذر
او عمامي تجي وين المشكر
و بكربلا كلها تكور
و الحرب ذيچ اساع يعمر
يشوفون وحده احسين يفتر
او صوبين بي حايط العسكر
و خوته چتل واللي امطبر
او عباس علعلقمي اموذر
يلكدها ذيچ اساع حيدر
و الاشتر يتبعه اعلي الأثر
يخلون كوفان تطشر
او ذيچ الروايه تذيه بالبر
و شلون واحد بعد يقدر
لحسين يوصل و يتجسر
لاچن اشبيدي علي المقدر
امكون علينه بعالم الذر
اخونا انچتل و احنا انتيسر
يا يوم اخوتي يوم اقشر
تمنيت ابوي اليوم بالكون
او حمزه او جعفر بي يحضرون
او عمار و الاشتر يجون
او باجي بني هاشم يركبون
و من المدينه ايليل يسرون
او كبل الفجر بالطف يصبحون
لحسين تالي السلف يحمون
او عباس بين الكوم مرهون
و حوته طبق نومه يونون
خلوا عمامي و كل هلي اشلون
خطاب للعباس (ع) عن لسان زينب (ع)
بالخيام لمن حاطت الخيل
كثر ويدها او هضل الرياجيل
و ندهشت اطفال او مداليل
و الحرم صار الهن عويل
زينب نخت و دموعها اتسيل
وين اخوتي او قومي البهاليل
يعباس يا عز الذليل
يابن والدي العسكر ثجيل
او للخيم چي ترضه يميل
و انت المشكر بالتهاويل
بالسيف يمسدر اليعيل
او لو شافك اينس الجبيل
يكلها يبت حامي الدخيل
لردها نكس بلشاشها اتشيل
شوفي اشكثر منهم مچاثيل
عيناچ لا تبچي المداليل
الجواب
انا ادريك يوم الكون فتاك
اولا تكدر الفرسان تدناك
انا امن المدينه جيت وياك
و مظلل اعليه ابذراك
ترضه اصير ابوليت اعداك
و احنه المثل هل يوم ردناك
تسلم او كل احنه فداياك
واللي اهي ابذرك او بحماك
من تنسبي اشتتعذر اهناك
امن اللوم معذور او تعداك
في عتاب الحسين (ع)
يحسين يا جلعة حمانه
او ياسور عزنه او ياذرانه
انخاك لا عني اتوانه
يابن والدي العسكر بيانه
قام و تحرك من مچانه
قرب للخيم چنه او تدانه
اوبن سعد باولهم لفانه
و احنه حرم محد اويانه
انچان ما تنهض ترانه
منهم تصح النه مهانه
او يشيلون كل عزنه عدانه
خيف العدو بعدك ولانه
و الخيم فرهدها او سبانه
بعدك هضم كثره علانه
يبات القلب يحسين مهموم
و العين لجلك ما خذت نوم
يا آية الواحد القيوم
بابن الصميده او كنز العلوم
يا كصوره اليفرث الصمصوم
يا موت فوق ارواحها يحوم
حسافه يخو زينب او چلثوم
تمسي علي حكك چتل مظلوم
و تموت عن الماي محروم
وين الصديج اليعتني اليوم
ايحشم بني هاشم او مخزوم
و هل المدينة او مكة اتكوم
للغاضريه تطوي الحزوم
تري احسين علغبره شبع نوم
العنده عشيره ايريدها اليوم
يا طارشي خذلي وصيه
او نواخي او عتب لهل الحميه
واحچي الجري بالغاضريه
او هضم الذي صاير عليه
عكب الخدر امشي سبيه
ليزيد ودوني هديه
شنهو السبب ما اعتنوا ليه
بيهم مضلت ناغريه
لنخوه او لشيمه هاشميه
ينامون عن هذي الرزيه
و احسين دمه عند اميه
اشبيدي هلي باچوا بديه
يا طارشي دسرع بالكتاب
بالك تعن او حث الرچاب
للنجف و اقصد داحي الباب
او قله الك مرسول بعتاب
من زينب او سكنه او رباب
او خبره احرگو كوفان الاطناب
و الاطفال ماخلو لها اثياب
او بناتك يبويه عكب الحجاب
راحن سبايه ابديرت اجناب
لو ناشدونه اشننطي اجواب
ملچن عشيره انكول غياب
حسافه يروس العرب ينجاب
علي الذل لويتوا اليوم الركاب
يا طارشي الحيدر تعناه
للغري الكبره و جف وانخاه
و خبره بجميع الجري او شفناه
او شفنا هضايم عكب عيناه
او لحسين كله اشلون تنساه
بالغاضريه او لحد اوياه
او حيدا و صفق يسراه ابيمناه
و خوته چتل و مسطره احذاه
او نار العطش تلتهب بحشاه
و اعلي الشرايع نازله اعداه
و الماي يمه او لحد اسكاه
لمن كضي ظامي او يلاه
يا طارشي دنهض ابمكتوب
او معاصب لبونه داحي البوب
بالضيج ابوالحملات مندوب
سيف النبي او جيدوم الحروب
عن وجه دايم يحلي الكروب
من تصل كله اكعد يمنتوب
تري احسين ظامي الچبد معطوب
عاري اولا خلوا عليه ثوب
ترضه بعزيزك يضل مسلوب
او زين العباد ابحبل مسحوب
من كربلا الكوفان مجلوب
عادت زلم طالب او مطلوب
لاچن بناتك شلهن اذنوب
راحن سبايه او كطعن ادروب
و الاطفال تشچي العطش و تلوب
عن هاي چان اتنام معتوب
او مثلك هظيمه ايصير مغلوب
يا طارشي دو صل ابهمه
و خذ معصبي وياك زمه
او توصل لبوجاسم او سلمه
او رج الرمح و انتحب يمه
او كله اعلي اخوك الخيل لمه
او عج الطراد اعليه ظلمه
ظامي انچتل و الماي يمه
او حال الطفل عنده تذمه
كطع ركبته حرمله بسهمه
او كله تري زينب تحشمه
ظلت ابين الكفر حرمه
محمد يخويه هاي هضمه
عتاب محمد بن الحنفية
محمد يخويه الله او لحد
المثلك ثنيته اشلون تنسد
او بعد الحسن و الحسين تنعد
سردال خيل او كلها تشهد
بيك الك چم مشهد ابمشهد
يوديك چان اوبيك يضمد
او سريتك اهي البيها السعد
ولوياك بيك اتنومس اورد
اشعاكك يخويه يا محمد
اوعن كربلا المثلك كعد
او لا جدم احصانه او عليه شد
او دغرق ابليل الكربلا اومد
او فزع لخوته او سيفه امجرد
ما خبروك احسين مفرد
او جيش اللفه العين الشمس سد
او دون الخيم صار الهدد
وا حسين ينخه او ماله احد
لو نك تشوفه من لكد
او عباس اخوه و اياه من شد
وخوتي ابذلوا كل الجهد
ابصولتهم الجيش انمرد
او مچاتيلهم ما تنحصي ابعد
او ما سلم غير اللي شرد
ما كصروا سووا لها حد
لاچن اشبيدي اعلي الوعد
امن احسين ماخوذ العهد
ينچتل بالطف واعده الجد
او علي الصار لا تنشد بعد
الجواب عن لسان محمد بن الحنفية
يكلها يزينب حق تعتبين
علي او سنيح اوساد تدرين
انا اشلون اجف عن نصرة احسين
سهو عزا لي او عيني اليمين
او شيخ العشيره اوبيه مزهرين
او سيد جميع الهاشميين
او عميد اعلي كل الطالبيين
و خوتي علي ما هم رخصين
حزام الظهر كلهم عزيزين
يا ذلتي صاروا بعيدين
يحكلي يخوتي لسكن البيد
و اصبغ اهدومي اولا البس اجديد
و نوحن علي خوتي المحاميد
بالكون يلكلهم صناديد
واللي يكصدوهم مناجيد
يا هو امن اخوتي موعميد
عباس يلزلزله امن ارعيد
و الكوم بس شافته من ابعيد
راياتهم راحت تماريد
ترضي ابخواتك يسر ليزيد
او يمشن ابهل حر الشديد
و الحرار تملكها العبيد
معذور يلمالك بكت ايد
او طرهامتك عامود الحديد
في حق علي الاكبر
حس ضغيره و صياح كبر
يقولون طلب للكون الكبر
حطبها او دعاها اذياه بالبر
نصي المعركه او قوم العسكر
او منها اشكثر فرسان كنطر
حر اوعلي الصيده انحدر
تفر او عليها ايحوم و نشر
يا زلزله اتطر الصخر طر
اويلاه غوجك من عثر
و رداك بموسط العسكر
اوچلوا عليك اولا حضر
اوبك او لحق شافك امطبر
او ظهره انحني اعليك او تهشر
او للخيم شالك يا غضنفر
او ليلي اطلعت بالخدر تعثر
او صاحت ابصوت الله و اكبر
يحسين وين ابني تكنطر
اوحيد او حاتفني الدهر
في ليلة (الله او لحد راح الكبر) الحادي عشر
هل ليله قشره اشلون ليله
كل اخوتي مست چتيله
اولا ظل ولي اللي نشتچيله
ابن سعد آمر وجت خيله
مغاوير و اسربها ثجيله
ما تنعرف من كل جبيله
او نطع العليه نايم عليله
جره النغل منه ابحيله
تمنيت حيدر حي و جيله
اعلي كوفان چي ذبحوا سليله
يعباس منته اللي جبتني
بيدك يخويه ركبتني
طول الدرب ما فاركتني
بس ما رحت عني او عفتني
عكبك بني اميه ولتني
خذوني يسيره اولا شفتني
دكعد يخويه او شوف متني
تري اسياط زجر و رمتني
اويلاه يوم السيبتني
يحسين اخبرك جابوا البل
او ركبنه يخويه رچبة الذل
و الاطفال طول الدرب تعول
تكلي يعمه انريد منزل
نكعد اسويعه ابكاسر الظل
تري ارواحنا للحر متحمل
كلي لحادينه يكيل
لمن شمسها اتطيح و تذل
كلت او علي غضبوا الكل
شتمني الشمر و يكول منزل
و نريد للكوفه نصل
اكظمت غيضي او دمعتي اتهل
يحسين جاب الحادي الجمال
ناوي يرچب اعليها العيال
و تلوع كامت كل الاطفال
من شدوا ايديهم بالحبال
و ابنك علي جابوه بيحال
و المرض منه نال ما نال
كالوا عليل اشلون ينشال
يوينچتل يوكيد بحبال
چتفوه للناكه او دما سال
و الظهر سج بينا الجمال
و احنه حرم من غير رجال
يحادي الظعن لا تحدي يمكدر
لاوين ناوي و الوكت حر
و خافن علي السجاد يفغر
و اطفالنه تبچي او تضغور
بلوعون و ام چلثوم تشغر
صدت اولن احسين بالحر
او شيبه ابدما نحره تعفر
او صدره ابحوافرها تكسر
صدت لعند الساچن البر
تكله شريدتنه تيسر
بالجامعه و الكيد ينجر
او خوله لعند النوق ثور
هزل و خافنها تعثر
و الشام دربه درب اكشر
او علي رچبة المهزول مقدر
او دمعي علي الخدين حدر
يحسين تدري الحادي من سج
باي ساعه راد السير و احوج
شال ابوكت حر الشمس وج
و اطفالك اعلي الماي تلهج
المچتوف منهم و الذي هج
او خواتك سترهن صاير العج
سبايه اعلي عجف انياق تعرج
ترضي العدو اعليها ايتفرج
و هل البلد كلها تورج
ويلاه الهضمي اجبال ترتج
يحسين تدري من خذونه
علي اجمال هزل ركبونه
او بحبال خشنه چتفونه
نشچي التعب ما يرحمونه
للكوفه حين الوصلونه
ابن ازياد آمر و اصعدونه
القصر الاماره و كفونه
بالمجلس اكباله اعرضونه
اعلي چتله او لواحد وقف دونه
من حين قاموا يسحبونه
صاحن خواته اشتطلبونه
دخلوا الشريده قطعتونه
اشصار اباهالينه او نسونه
ينامون عن ثارات اخونه
رچبتي يخويه اشلون رچبه
علي ناقة عجفه او صعبه
او طول الدرب عيني امر به
او بس دمعتي اعلي الخد مسچبه
او للشام طبتي اشلون طبه
شفت كل اهاليها مطربه
او بقلوبهم ملنا امحبه
او راسك يزيد آمر بنصبه
او بالعود كل ساعه يضربه
و يقول اخذنا ابثار عتبه
يحسين للشام امن اجينه
كلها اطلعت تبحر علينه
او بالرمح راسك شايلينه
و ابنك علي ماشره عينه
يون او شعب قلبي او نينه
اولا طارش يصل المدينه
يخبر هلي بالمر علينه
يقلهم لهلنا احنه انسبينه
او ثور يزيد ايريد دينه
استافه او چتل منكم العينه
نمتم حسافه احسين وينه
كلي بعد يحسين شلها
بس دمعتي ظليت اهلها
يزيد النوي اعليها فعلها
مثل عملته محد عملها
دنهض يحيدر واكعد لها
هيل الترب هذا محلها
مظنيت لسا يصبر لها
في رثاء العباس عليه السلام
لو هلهلت عد زايد الباس
اخوها الشفيه الليث عباس
تنخه اوعدها فرع الراس
و افرغ عليه الدرع و الطاس
علي الكوم صول شبه جرناس
ولاها و خمد منها الانفاس
و بظهر غوجه اعلي الجثث داس
اويلي عليه انضرب علراس
و احسين ظل مهبط الراس
و يكول مني راح عباس
يحسين تدري ليك من جيت
امن الشام و لكبرك تعنيت
و اقعدت عد راسك بچيت
او ندهتك يبو الشيمه او تنخيت
ما جاوبتني و علي نبيت
يمهر احسين وين احسينا طاح
بعد بيه روح يوبسيوفها راح
يمهر احسين دليني علي احسين
عزيز الروح صارت وكعته وين
هل عسكر عليمن فزع صوبين
و اسمع هضل بالميدان و صياح
علامك يا مهر تسحب بالصروع
يمكدروين عفت احسين مشلوع
تتفازع عليمن ذيچ الفزوع
و اسمع بالسما جبريلها صاح
بچا اودون الخيم كثر صهيله
او قامت تعول اعياله العويله
فرن صارخات اليم عليله
ينوحن و العليل النوحهن ناح
يقللها يعمه احچيلي اشصار
خواتي امن المخيم غدت طشار
تقله انذبح عزنه واجو النار
ابخيمنه او حرم كلنا مالنا اجناح
يحيدر بالخيم شبو النيران
مثل سرب الكطا فرت النسوان
يحيدر بالمخيم شبو النار
او راحت كل بناتك شتت طشار
تصيح الغوث وين احسينا صار
لكنه يعالج ابحومة الميدان
لكنه يلوج و يعالج ابروحه
يون واللي مچيداته اجروحه
دون الشمس و كفن لا تلوحه
يفين و التهفي ابطرف الردان
بچن عنده او عليه نصبن مناحه
او زينب تصفج اعلي الوجه راحه
بطل حيلي متت من غير راحه
فوق القاع ظامي الچبد عطشان
يبعد اهلي اشتهيس قول يحسين
او دليني اصواب الچايدك وين
يخويه امنين جتني كربلا امنين
عسي ابعيد البلا ولية العدوان
عسي ابعيد البلا بالقاع ممدود
تعالج بالشمس و بروحك اتجود
حسافه اتموت ظامي الچبد ممرود
او مركز صرت للنشاب و الزان
يخويه اكعد خواتك دايره اعليك
او من خوف العساكر فاره ليك
يخويه بكترك اسكينه تحاچيك
تكلك ترضه يسبوني العدوان
يخويه اشلون ترضه امشي يسيره
تكلفني يخويه ابهل جريره
عكب هل نايبه الجتني چبيره
اباري اعيالك اوها كثر رضعان
لبعضهم
ما يفيد نوحي و لا ابچاي
عكب الشهيد الما شرب ماي
انا ابچي و سكنه تزيد لبچاي
و انعي تساعدني علي انعاي
دنهض يبو الشيمه و تعال
و انظر بناتك بين الانذال
و ابنك غدا بين الرمال
و يمناه مكطوعه و الشمال
خذونا يساري فوق الاجمال
كلبي احترق و الهضم چتال
و دمعي علي الوجنات سال
معذور يالنايم بالطفوف
مكطوع راسك و الچفوف
دكعد من منامك و شوف
مني مسلبه و الكلب ملهوف
و دمعي علي الوجنات مذروف
و اعليلنا بالحبل مچتوف
لودي لعد حيدر مكاتيب
و ابچي او كثر بالمعاتيب
من يوم فاركني الحبيب
دمعي علي الوجنه سكيب
و چبدي كثر بيه اللهيب
دنوحي يسكنه اعلي الغريب
و چلثوم كثري بالنحيب
علي بدم نحره خضيب
و جسمه علي الرمضا تريب
و عكبه مشيت بيسر تغريب
و ممشي الحرم و يا الغرب عيب
يا شبان بالله لا تونون
و بونينكم كلبي تكطعون
تهدون حيلي من تلوجون
يا ثمرة فوادي متحچون
ما ادري يا هل كلبي اشتردون
حسرات عا الدنيا تجرون
و عيونكم ليها تديرون
تشعبون كلي من تونون
يا مغسل الشبان بهداي
بهدا دصب عليهم الماي
تري و نينهم كطع احشاي
و خابت ظنوني و خاب رجواي
للسيد حسين بن السيد طاهر
يحادي الظعن كلي وين تردون
علي جثة ولينه ما تمرون
يحادي الظعن ما تشفج علينه
و تمر بينا علي عزنا او ولينه
يمه تكعد اسويعه سكينه
تشمه و تلثم جروحه و تشيلون
مر بينه نودع حسين ساعه
يسر كلبي و يرد روحي و داعه
مهو حسين الشعب كلبي و راعه
و خلي الكلب طول الدهر محزون
يخويه البيك حاتفني زماني
و مشاعني و بالذله رماني
و لا واحد عكب عينك حماني
بس اطفالكم يمي يلوعون
ما تدري يخويه اشلون حالي
و علي راس الرمح راسك كبالي
كلمن شاف ذل حالي بچالي
عدوانك عليه غد وايبچون
يخويه بلخيم شبث النيران
يخويه من الهضم فرت النسوان
يخويه ريت يومك چان لا چان
بيه الشمس غابت و اظلم الكون
حرايركم غدت يا ابن البهاليل
سبايا تركب النوق المهازيل
من يبري الظعن لو ساق بالليل
و من يرچب اطفالك من يطيحون
اشلون امشي و خلي حسين وحده
طريح او يابس من العطش چبده
عسن خدي معفر دون خده
و كلبي دون كلبه چان مطعون
بنفسي حسين خويه اصل يمك
و اصبغ شعر راسي بفيض دمك
چيف اصبر و شوفن فوق جسمك
تجول الخيل و براسك يطوفون
و حق راسك يعكلي و نور عيني
و طول الدهر ما يفتر ونيني
چيف اتلومني من اعمي اعيوني
علي اهلي المشوعني او ضيعوني
و لا واحد عكبهم و كف دوني
و من جوني العداو كاموا يشيلون
تمت